現年40歲嘅「韓國第一大美人」金喜善,於2007年嫁富商朴駐英,並於2009年誕下囡囡。日前金喜善接受綜藝節目《Section TV演藝通信》訪問時,就提到老公及愛女。

 

今年同老公結婚10周年,雖然金喜善冇提到會點同老公慶祝,不過金喜善就表示同老公感情好好:「我哋咩都會攤開嚟講,我甚至會喺夏天時着老公嘅四角短褲,因為通風啲。」相當盞鬼。金喜善又坦言自己當年陀B時重咗好多:「依家嘅體重應該比結婚前重咗22磅,不過當時陀B時係我最重嘅體重,曾高達180磅。」

 

金喜善又表示囡囡一開始唔知自己係藝人,曾經有人同囡囡講「聽講你媽咪係藝人?」,囡囡先知自己係藝人,金喜善稱:「當時一度覺得自己藝人嘅身份對囡囡造成不便。」主持人又問道「李政宰及張東健曾感嘆你嘅美貌,亦聽講宋承憲高中時期為咗見你一眼,來回7公里嘅路?」對此金喜善就大笑。

 

另外,有指金喜善鼻上嘅美人痣係整上去,金喜善就透過節目再次澄清:「由細到大都有,唔信你(主持人)可以摸下。」而主持人亦代為證明金喜善嘅美人痣係真。

(蘋果日報)