陸浩明(6號)同女友陳詩欣(Ayan)經常喺網上放閃,隨便睇一睇佢哋ig,都會見到兩人合照。今日兩人終於以情侶檔去到荃灣出席婚戒品牌活動,仲即場炮製愛心蛋糕。6號話同女友係第一次拍拖出活動:「比起自己做MC,心情緊張好多,因為又要睇住佢,有同佢練台詞。」6號話自己講嘢還可以,但係要影相就好緊張。

 

自從兩人一齊亮相過汪明荃嘅節目《1+1的幸福》之後,6號坦言多咗好多情侶檔活動邀請,有冇諗過幾時變夫妻檔?6號話:「真係多謝Liza姐,做夫妻檔就要生小朋友啦,咁可以做埋奶粉尿片嘅邀請,自己心理同生理上都Ready,但係經濟上未Ready。」

 

6號又透露希望結婚之後,可以搬個大啲嘅地方住,但o依家樓價好難上車,唯有做多啲嘢希望一年內成事。問到Ayan覺得點?佢就好怕醜咁話:「佢OK我就OK。」6號仲話屋企人無催佢哋結婚生小朋友,反而肥媽就係咁催,佢話:「肥媽有十幾個孫,有鋪儲孫癮,佢仲話如果我生會免費幫我哋陪月,你知請肥媽陪月要七位數字㗎嘛,所以要努力啲做嘢。」

(蘋果日報)